政情：莫偉全見記者騰晒雞
尋日本港空氣污染指數爆燈，環境局局長邱騰華尋日中午急急拉埋各部門官員同專業人士喺政府總部交代如何反應，包括教育局、醫生、天文台同埋環境保護署。唔知係咪畀啲沙塵暴嚇親，人人都表現生硬，當中以環保署助理署長（空氣質素政策科）莫偉全就最緊張兼騰雞。
可能係較少面對傳媒，每次輪到莫偉全上前發言，佢都將手上嘅文件重重咁放低，好似要事先壯膽咁，但係壯膽都無用，佢一直都答非所問。記者問佢現時本港空氣污染指數頂晒籠都係得五百，如果指數升超過五百後會點處理？又會唔會設立類似紅雨同黑雨嘅機制，等啲市民同學童做好準備？莫偉全就答︰「唔排除指數可能會增加，但現已在高水平，正如局長咁講，市民唔好做太多劇烈運動。」畀佢激死！
下次有咁大場面，可能都係由署長現身好啲，助理署長驚講錯嘢都係情有可原嘅，環保署署長王倩儀尋日唔知忙緊啲乜呢？