政情：陶君行被狠摑一巴

社民連主席陶君行搞所謂「五區公投」，出晒名言行激進；佢前日出席禁毒活動時，言論更出格。政府一直宣傳吸毒係「不可一、不可再」，呼籲青少年毒品一次都唔可以掂，點知陶君行就反其道而行，當日竟然向在場過百名學生講：「吸毒係只可一、不可再。」即時全場嘩然，搞到政府尋日透過發言人鄭重強調：「年輕人一次也不要嘗試吸毒。」狠狠摑陶君行一巴掌。

陶君行日前以美國總統奧巴馬同前總統克林頓年輕時都試過吸食可卡因為例，同在場學生講：「（毒品）食一次就好喇，試一試，係咪？」佢自辯舉呢個例子只係想曾經吸毒嘅青少年明白到，迷途知返係有機會翻身喎。

政府尋日就以回應傳媒查詢為由發表立場，強調吸毒對身體造成不可逆轉嘅傷害，所以反吸毒宣傳一直叫後生仔毒品一次都唔好試。發言人最後仲夭心夭肺咁加多句：「期望社會大眾在各自崗位上，帶出『不可一、不可再』的訊息。」言下之意批評陶君行亂噏嘢，叫佢以後好自為之。