政情：Rita劉夢遊立會頻噏錯
立法會財委會尋日起召開連串特別會議，問責高官排隊上去就鬍鬚曾嗰份劣評如潮嘅預算案解畫，平時同議員過招無數嘅問責高官都打醒十二分精神去應戰，但唯獨商務及經濟發展局局長劉吳惠蘭（Rita）有啲失準。話說自由黨主席劉健儀喺會上提及新加坡有環球影城，澳洲亦有唔少新景點，但香港僅靠內地客撐住旅遊業唔多夠，人家喺香港做好多電視旅遊推廣，但外國見唔到旅發局宣傳片，質問政府有乜大計吸客？
Rita順水推舟推畀旅發局答，點知開口就話：「呢個問題就交畀旅發局總裁劉鎮漢講吓啦！」總裁？乜旅發局有總裁咩？財委會主席劉慧卿無即時指正Rita，只係大大聲、逐字逐句咁話：「旅發局總幹事劉鎮漢就講清楚啦！」擺明係講畀Rita聽。
跟住民主黨何俊仁問貿發局盤數係咪應交畀立法會睇、點解可以唔納入審計署審計範疇？點知Rita又連續兩次噏錯貿發局係旅發局，今次卿姐忍唔住口，問Rita做乜淨係掛住旅發局？Rita終於如夢初醒，話貿發局同旅發局都掛住，兩個局都係佢局內範疇。睇嚟Rita下次去立會要瞓足啲至得！