政情：楊家駿：未適應港節奏
一連幾日嘅復活節假期快到，唔少人都把握機會出外旅行充電，不過台灣駐港最高代表、中華旅行社總經理楊家駿就決定留喺香港。楊總話，平時喺香港日日做到冇停手，冇乜機會逛吓，所以決定利用呢個長假，做個全職遊客，好好了解香港喎；佢已計劃去西貢行山、坐昂坪360纜車同埋去銅鑼灣食壽司，節目認真豐富。
指台生活較具人性
移居香港一段日子嘅楊總話，佢同家人都幾鍾意呢度嘅生活，又讚香港夠晒熱鬧，人亦好friendly（友善），唯一未習慣係香港人嘅極速步伐。佢覺得台灣人行路無港人咁急，亦唔會好似港人咁攰死都唔休息，相比之下，台灣人嘅生活「比較符合人性」喎。
香港同台灣均以美食聞名。講到美食，楊總都係覺得台灣略勝一籌喎，不過佢唔係話香港嘅嘢唔好食，只係話香港好質素嘅美食比較貴，唔係人人負擔得起啫，相反台灣就一街都係各式各樣好食又地道嘅平民小食喎，睇嚟香港貧富懸殊情況較台灣嚴重！