政情：劉健儀同張廿蚊劃清界線

自由黨以功能組別起家，但面對立法會功能組別議席勢將逐步萎縮嘅現實，佢哋一早將大量資源轉移直選戰場，希望功能、直選雙線發展；即使○八年兩名黨內重量級領軍人物田北俊同周梁淑怡分別喺新界東、西敗陣，大戰略未變，睇吓近日該黨喺最低工資問題發生嘅事，就可知一二。

○八直選 死因之一

消息話，Tommy突然提出最低工資時薪二十元，事緣呢個一直係飲食界嘅「願望」，而Tommy最近委託大學所做嘅飲食業最低工資調查，所得數值亦與此數相當接近，所以諗住以「二十蚊」為底線畀僱主作參考，點知言論一出，群情洶湧，前日喺城市論壇仲畀人掟廿蚊紙，事件變成唔止Tommy個人嘅事，而係關乎自由黨直選之路嘅政治炸彈。

自由黨○八年直選全軍覆沒，賽後檢討，認為死因之一係重創於最低工資問題嘅言論炮火之上，依家硝煙再起，點到Miriam掉以輕心！佢尋日以快刀斬亂麻姿態開記招，澄清Tommy言論只屬個人意見，唔代表自由黨，仲話Tommy可能喺論壇上被人激親，一時動氣至衝口而出。Miriam寧願公然同Tommy唱對台，都要同Tommy劃清界線，自由黨有幾着緊基層選民嘅觀感，可想而知。不過，以咁強硬嘅姿態澄清黨友言論，以前自由黨就好少有。

我哋問自由黨前主席田北俊點睇單嘢，佢話同情Tommy處境，亦欣賞Tommy敢於發表一小部分茶餐廳老闆嘅心聲，而Miriam所講嘅時薪廿四元，的確又係四大商會都認同嘅合理水平。點到即止，言簡意賅。自由黨兩代主席嘅風格，由今次事件可見一斑。