中環耳目：劉陳小寶醫肚最愛Cova天使麵
保良局榮譽顧問劉陳小寶（Angel）喺飲食方面絕對專一，佢個辦公室位於美食林立嘅銅鑼灣區，本來搵食有好多選擇，但佢只會幫襯兩至三間食肆，其中Cova就係佢指定嘅「西式飯堂」，高峰期一星期五日都喺度開餐，事關呢度食物種類多，咖啡又夠熱。不過，Angel最鍾意係Cova嘅意大利粉，餐牌通常都會有龍蝦或蜆肉linguine，佢有時會要求改為天使麵，但係只會食半份，留番半份帶番公司請同事食，順便可以控制自己嘅食量。
意國皇室都幫襯
Angel話以前做保良局主席時，好多應酬，尤其卸任嗰年，幾乎每日都有人請食飯，鮑參翅肚食足一年，食到怕怕，所以唔使應酬嘅日子，佢鍾意食得清淡啲。
Cova係歷史悠久嘅高級意大利餐廳，連意國皇室都幫襯，由意大利帶到嚟香港，成為城中名人飯堂，好像林青霞、楊千嬅、何鴻燊四太梁安琪和白雪仙等等名人，都係Cova嘅常客。