中環出更（二）：食力簡做分期一生只一次
香港地百物騰貴，分期買樓、買車好普遍，但牙擦擦嘅退休練馬師簡炳墀就拒做「息魔」奴隸，買車買樓買錶，統統一次過付清，一生人只做過一次分期，仲係分期一年搞掂。咁有「食力」，真係恨死隔籬！
80年代買樓
話說沙田馬場早前上演香港打吡大賽，簡Sir戴上黑超入場睇好戲。大會順便展出一部價值七百多萬元嘅頂級轎車MAYBACH造勢，卓妮睇見都心動，身邊嘅簡Sir就話無乜大不了，佢數數屋企車房，話單係Benz就有三部，勞斯萊斯亦有三部，畀佢揀，寧願揸勞斯萊斯多啲，出街成隻蟹咁，夠煞氣！
簡Sir愈講愈牙擦，自爆買勞斯萊斯亦毋須分期，佢邊晒命邊攞出身上一張AE黑卡，話用佢碌一碌，買幾百萬房車都係一鋪清，唔使煩。卓妮問佢，人生中有冇試過分期付款，簡Sir諗起八十年代購入價值四百幾萬嘅大埔康樂園時，問過銀行借錢，但年期短到你唔信，就係分期一年。嗰年簡Sir馬運亨通，獎金滾滾來，結果唔使一年還清樓債，真巴閉。
卓妮