中環出更（一）：青聯筍工幫畢業生尋出路
之前卓妮預告過，香港青年聯會四月活動多，四月九日有青聯女將賢慧社搞嘅「愛家日」，帶觀塘低收入家庭兒童去海洋公園玩番日，到四月廿四日輪到畢業生受惠，由青聯副主席朱鼎健（Ken）做召集人搞嘅「新鮮人工略」，將會幫大專生搵工。尋日青聯主席陳仲尼（Rock）call咗有份搞活動嘅兄弟姊妹傾吓點搞法，卓妮都貢去八吓。
朱鼎健請人不問出處
「新鮮人工略」今年係第二年搞，舊年阿Rock做搞手，吸引咗三千幾個學生即場面試，成功搵咗六百幾份工。今年阿Ken接手，身為觀瀾湖行政總裁嘅佢，首先喺自己機構掘職位，由前台八、九千元月薪嘅服務員到兩萬元嘅私人助理職位都有，阿Ken仲話畀卓妮聽，到時可能會問吓應徵者人生最大嘅低潮係啲咩，又會問吓佢哋未來五年想賺幾多錢等等，睇吓佢哋嘅人生觀及新聞觸覺。阿Ken覺得香港嘅年輕人兩文三語好、識執生同有國際視野都係最大優勢，所以唔會僅考慮應徵者係咪大學生，即係話就算ＩＶＥ（香港專業教育學院）畢業都分分鐘釣到份好工㗎！
至於其他青聯嘅兄弟姊妹都唔手軟，個個都努力喺自己公司掘「筍工」出嚟，好似信和置業嘅黃永光、合和實業嘅胡文新、新世界發展嘅鄭志剛、莊士國際嘅莊家彬同莎莎都有提供職位。賢慧社嘅羅詠詩話之前佢去合和開會，聽到有個女職員嘅普通話字正腔圓，後來問開胡文新先知，對方原來係合和喺三千個大學生裏面搵出嚟嘅見習生，胡生大讚三個見習生好有質素，所以二話不說就答應提供職位畀「新鮮人工略」。
阿Rock仲話佢哋唔淨止要解決青年人失業問題，佢哋嘅目的係要幫學生哥搵到可以發展嘅職位。好似咭片皇創辦人鄭重科，佢公司之前請咗個肯學肯做嘅年輕人，依家畀Apple請咗去美國做設計師，令佢哋更希望可以幫到年輕人搵份好工。
卓妮