政情：張震遠重建不談浪漫
喺上環永利街取景嘅港片《歲月神偷》載譽歸來，影片製作人要求保留○三年已被市區重建局納入重建嘅永利街，保育團體亦全力跟進，但政府同市建局到家吓都唔肯表態。市建局主席張震遠尋日喺電台節目《香港家書》中，撰文講馬頭圍道重建，但講講吓變咗解釋市建局嘅重建策略。佢話我哋唔可以因為個人浪漫情懷犧牲需要援手嘅弱勢社群，呢句「個人浪漫情懷」指乜嘢佢冇講明，但《歲月神偷》嚟緊就會上映，張主席嘅壓力恐怕會愈嚟愈大。
事實上，近排支持保育上環永利街嘅行動一浪接一浪，繼做過市建局成員嘅海洋公園主席盛智文開腔要求保留後，有地區團體亦發動簽名行動，網上更不乏撐保留「老香港」特色嘅言論，令政府同市建局壓力愈來愈大，或者係咁，張震遠先不點名咁講吓浪漫情懷同重建嘅關係啫。
佢仲呼籲港人要重視本港樓宇老化嘅現實，但同時亦要重視舊區居民居住環境惡劣嘅現實，希望大家睇到呢兩個現實，唔好淨係講「個人浪漫情懷」。