政情：邱德根唔評亞視股爭
亞視兩大股東查懋聲同台灣商人蔡衍明嘅爭拗行動升級，成為全城熱點，最近仲鬧埋上法庭。身處北京出席兩會嘅全國政協委員查懋聲一改沉默，批評蔡衍明無理取鬧，嚟個高手過招。呢場「亞視風雲」最後點收科唔知，不過當年做過亞視老闆嘅遠東集團創辦人邱德根就盛讚查懋聲係好人。
尋日我哋喺馬場撞到邱德根，當然要問吓佢點睇呢場風波。邱德根可能對亞視不斷傳出負面新聞感到心噏，一開始都唔係太想回應，不過睇嚟佢仍然對亞視有好深厚嘅感情，最後都忍唔住講幾句，盛讚查懋聲係個好人，仲相信亞視係有得做，佢話最重要係搵多啲人才。至於點解決兩個股東嘅官司，佢就話唔評論嘞！
邱德根出到聲讚查懋聲，佢撐邊個，不言而喻。其實邱德根同查懋聲已故爸爸查濟民係多年好朋友，佢哋兩老都係先喺上海發迹，再落香港發展，大家可以話惺惺相惜，當年仲一齊成立仁濟醫院，堪稱為世家；在情在理，邱德根撐查懋聲都係無可厚非。