政情：劉吳惠蘭老實變倒米
政制及內地事務局局長林瑞麟（林Ｄ９）同商務及經濟發展局局長劉吳惠蘭（Rita）尋日繼續台中市訪問行程，去咗南投縣考察當地旅遊服務及配套設施，包括乘搭日月潭纜車。台灣傳媒問兩位局長點睇日月潭纜車與香港纜車，Rita竟然好老實回答話，兩地纜車都感受到高空涼風吹拂嘅感覺，但日月潭纜車嘅窗外景色較綠喎。
日月潭風景如畫世界知名，優勝過香港海洋公園纜車或昂坪360纜車嘅窗外風景，雖然Rita講嘅係老實話，但作為負責旅遊範疇嘅局長，咁講就變咗幫香港旅遊倒米囉！相反林Ｄ９就答得四平八穩，話兩地風景各有優點，日月潭纜車只係開辦咗幾個月，非常新，而香港新同舊嘅纜車都有一定水平，台灣嘅朋友都非常喜愛，完全係施展「錄音機」嘅本領，包保無出錯。