政情：曾德成EQ低亂發老脾

睇番德成局長嘅官方履歷，佢確實做過近卅年傳媒，佢做傳媒嗰陣，的確有好多記者行家未出世，但唔代表新一輩記者無資格問佢問題，所以即使佢發老脾，記者一於少理，好客氣咁重複多次問題，德成局長面對截住去路嘅記者，惟有回應話：「你哋頭先聽到嘛，你哋頭先聽到台上點講法嘛！」都係嗰句：答咗等於無答，睬你都傻。

上任至今 辣起唔少火頭

其實德成局長○七年上任至今，發老脾辣着唔少火頭，好似上任初期拜訪十八區區議會時已向議員施展下馬威，去到元朗區，有議員不滿佢逗留時間太短，點知佢窒番個議員話：「雖然我唔知出年見唔見到你，呢個唔重要……」咁啱○八年係區議會改選，德成局長咁講，擺明暗寸人哋未必連任成功。與立法會議員交鋒就更加精彩，最激一次係揶揄「民主阿婆」陳方安生參選立法會後才知道民間疾苦，更嘲笑話：「原來除咗忽然民主之外，仲會有忽然民生」，寸到民主阿婆毫無還擊之力。

○八年中一場大雨搞到大澳斷水斷糧，居民與世隔絕好㷫，街工梁耀忠質問政府喺事件中吸取乜嘢經驗，點知德成局長又好似被擊中要害咁，反駁話：「可能有啲人成日接觸怨氣大嘅人，但有啲人就接觸到好多平和嘅人」。

今年一月，立法會民政事務委員會討論東亞運動會功過，有議員批評政府一味歌功頌德，未有檢討比賽前後發生嘅甩漏問題，德成局長又忽然成個彈起話，有啲人見到政府成功舉辦東亞運睇唔過眼喎！如果德成局長再唔提高ＥＱ，要捱埋餘下任期都幾辛苦。