中環出更：撲返港撐囡囡 小吉拉頭馬

早幾日卓妮明明喺機場撞到全國政協委員方黃吉雯（小吉）坐飛機上京開兩會，前後都唔夠幾日，尋日竟然見佢喺馬場現身，唔通卓妮眼花？唔係唔係！卓妮無睇錯，小吉真係返咗嚟呀，事關佢囡囡方善政（Bonnie）尋日有馬出，充滿慈母心嘅佢風塵僕僕都特登返嚟捧囡囡場，即晚又飛返上北京。好彩囡囡隻「科研精英」都無令小吉白坐飛機，贏咗場頭馬。

「科研精英」贏頭馬，方黃吉雯（左）同囡囡方善政開心到飛起。
「科研精英」贏頭馬，方黃吉雯（左）同囡囡方善政開心到飛起。

記得上星期二卓妮喺機場見到準備啟程上京嘅小吉，當日佢只係輕裝上陣，小吉話佢上去嗰日唔凍，不過第二日就氣溫開始下降，聽講過兩日仲會得番攝氏一度，所以佢今次返香港，都會順便執多件大褸上去。

方黃吉雯仲興奮到攬住囡囡方善政。（徐家浩攝）
  • 方黃吉雯仲興奮到攬住囡囡方善政。（徐家浩攝）
「科研精英」好有性格，頒獎嗰陣點都唔肯畀人拉住影相，連方黃吉雯（右三）都要彈開。 （溫國佳攝）
  • 「科研精英」好有性格，頒獎嗰陣點都唔肯畀人拉住影相，連方黃吉雯（右三）都要彈開。 （溫國佳攝）
盛智文一身黑衣，話黑色都係佢嘅幸運色。
  • 盛智文一身黑衣，話黑色都係佢嘅幸運色。

Bonnie扮嘢文同愛黑色

講番隻馬，Bonnie話因為佢喺牛津讀科學，所以幫隻馬改名叫「科研精英」，唔知係咪因為咁，Bonnie都唔信邪，鍾情黑色嘅佢尋日以一身行政人員黑Look入場，連佢有份設計嘅騎師綵衣，主色都係黑色。其實黑色一啲都唔「黑」，事關隻馬雖然係頭炮拉頭馬，但原來只出過三次賽，之前兩次都係攞第三。隻馬雖然跑得，但亦好有性格，跑完頒獎嗰陣，點都唔肯畀人拉住影相，無得為「第一次」留念添。

咁啱得咁橋，同樣破格嘅海洋公園主席扮嘢文，都係以黑衫入場捧佢個BB「幸運多多」。扮嘢文仲話黑色係自己嘅幸運顏色；雖然隻馬最後跑梗頸四，但都有四萬五蚊獎金，都算係攞番個彩！

卓妮