民主黨立法會議員張文光兩公婆向來鍾意周遊列國，前年去咗充滿神秘感嘅伊斯蘭國家伊朗，上年又去法國南部尋訪著名畫家梵谷嘅蹤迹，嚟緊農曆新年又計劃去以饑荒同內戰而聞名嘅埃塞俄比亞旅行，仲搵埋黨友李永達、甘乃威同兩人嘅太太，三啤人一齊去非洲獵奇。
張文夫婦出名恩愛，高達同太太陳樹英就一度因第三者而分開，但最終都走番埋一齊。問佢係咪想借助今次旅行，幫鬧出「示愛風波」嘅甘威同太太重修舊好，張文就笑而不答，只係話今次旅程仍在籌備階段，唔知最後去唔去得成。
工聯會議員黃國健亦計劃農曆新年假同太太去日本仙台同青森玩五日，好彩工聯會啱啱決定咗杯葛五區補選，否則黃國健又要被迫留港助選，太太肯定唔高興。
