黃國健（KK）話，有兩位議員當晚「畀人用棍追咗幾條街」，指當晚佢同其他議員想離開立法會，佢因為留低咗個背囊，於是返轉頭攞，不過行先嘅兩位同僚「畀人意圖攻擊」，雖然冇郁手，但有行埋去指罵。

石禮謙證實當晚八點鬆啲離開立法會，的確有一名男子拎住嘢行嚟用粗口鬧佢，但係自己「聽粗口聽慣……要鬧就鬧」。石禮謙話自己一條頭髮都冇受影響，所以「冇乜所謂，亦冇驚過、冇畀佢嚇倒」。

有建制派議員提到當晚情況都幾激動，認為有議員話當晚「冇問題可以行出去」係風涼話，直指「事實我哋就出唔到（立法會）」，議員一離開就畀人粗口爛舌鬧、又推鐵馬，「呢啲唔係暴民係咩」、「裏面真係有暴民㗎」，令佢太太不知幾擔心。