曾經喺一九九七年狙擊港元嘅全球頭號大鱷索羅斯（George Soros），打算喺香港設立索羅斯基金管理公司，仲派咗兩位大內高手坐鎮香港，睇嚟金管局有排冇覺好瞓。不過，尋日金管局總裁陳德霖仲談笑風生，話冇諗住去警告人哋，但會注意市場嘅波動情況。
索羅斯今日會親自來港造勢，出席喺香港大學舉辦嘅「與索羅斯對話」講座。尋日我哋喺中環撞到陳德霖，問佢今日會唔會去講座度打聽吓大鱷嘅部署，陳德霖話唔會啦，因為今日佢有好多嘢要做，去唔到啦！
當年大鱷狙擊港元功虧一簣，搞到前金管局總裁任志剛一夜白髮，陳德霖當年都有份參與其中。經過十三年嘅休養生息，索羅斯嚟一招「不入虎穴，焉得虎子」，睇嚟好戲仲喺後頭。
陳德霖由特首辦主任回巢金管局啱啱四個月，出走多年後終於做番自己老本行，佢即時生猛晒，喺立法會嘅表現比任總謙虛好多，喺圈中有唔少好評。不過陳總笑謂唔可以人比人，佢只係表現一貫風格啫！