本文重點
飛機餐製作難度相當高，除咗要防止食物變壞外，又要食物翻熱後好味，但呢啲都難唔到鏞記酒家老闆甘健成。鏞記尋日再度與國泰航空合作推出中華美食飛機餐，甘老闆深明飛機餐要翻熱嘅缺點，於是想出一系列愈翻熱愈好味嘅靚鵝菜式，加上鏞記四款秘製醬汁，愈翻熱就愈入味，喺幾萬呎高空上都可以享受鏞記享譽國際嘅上等佳餚。
多款燒鵝菜式
甘老闆話，燒鵝翻熱後好難保持香口脆皮，所以佢特別想出五款飛機餐新菜式，包括陳皮鵝湯、紅棉（魚肚）陳皮湯、砂鍋梅子鵝、鵝肝腸滑雞煲仔飯及鹹菜鵝絲紮，再配合四種獨有秘製醬汁包括金豉汁、牛柳汁、宮保汁及沙茶汁，全部都愈煲愈惹味。此外，甘老闆仲將市面甚少售賣嘅「蝦子紮蹄」重新推出，將呢種具有幾十年歷史嘅傳統食品喺飛機上發揚光大。
卓妮