明肇豐同卓妮講，佢爸爸明嘉福曾經係皇家香港高爾夫球會會員，嗰陣入會好難，每個會員都係非富則貴，佢六歲嗰陣，爸爸問都冇問就逼佢學golf，搞到佢對golf好厭惡，但唔學又唔得，直到去美國讀大學，先至對golf培養到興趣。何解？明肇豐實話實說，佢話：「大學有golf讀，係專業高爾夫球課程，上堂打golf可以計學分；打得好就有Ａ，總分都會拉高啦！」

明肇豐囝囝Justin（右）同囡囡Elizabeth打波前先做熱身。	Elizabeth天真可愛，揮桿都得意。	明肇豐嘅拍檔兼教練Kenneth（右），親自指導Justin打波。

教練係爸爸徒弟

佢仲同卓妮介紹埋個教練Kenneth，原來佢爸爸以前教Kenneth打golf，依家大家變成好朋友，一齊投資過百萬，開設呢間佔地逾千呎、位於中環嘅Mini Golf Gym，開業短短大半年，生意好唔錯，啱啱仲喺九龍開多間分校，仲話以前打golf係奢侈品，依家變得平民化。

咁呢個idea係點嚟嘅呢？明肇豐話當年打golf係喺四十呎大貨櫃裏面學，設施好唔齊全，乜都好簡陋；依家打golf好普遍，對仔女Justin同Elizabeth都受佢影響，細細個就扭計要學：「夏天見到對仔女打golf真係好辛苦，又曬、又熱到大汗疊細汗，喺室內不知幾舒服，又有冷氣歎，仲可以順便發掘兼培訓有潛質嘅小朋友。」期間卓妮見明生個女Elizabeth唔小心倒瀉水，小妹妹竟然好自動自覺問菲傭攞紙巾親自抹地，卓妮睇到，覺得呢個細路女好有家教，一啲都冇千金小姐脾氣。

講開又講，細細個打golf有乜好處呢？明肇豐就賣花讚花香咁話：「細細個學打golf，除咗可以鍛煉肌肉外，仲可以訓練小朋友嘅耐性同紀律。」佢見卓妮在場，即時露兩手，親自教對仔女打golf，佢對活寶貝年紀細細就打得有板有眼，果然係訓練有方！

卓妮