呢嗱，就咁，你只要攞出一部iPhone或者Nokia Smartphone手機，簡簡單單撳幾個掣，你就可以輕輕鬆鬆瀏覽東方報業集團旗艦網站on.cc提供嘅免費資訊，你話嘞，係咪足不出戶能知天下事先？如果你想生動少少，可以咁講：手指郁一郁，盡知天下事。

到底有乜嘢資訊呢？你知啦，報章銷量全港第一嘅東方報業集團擁有得天獨厚嘅新聞採訪優勢，提供嘅資訊當然包羅萬有，包括港聞、娛樂、財經、體育等等七大類別嘅即時新聞，連交通同天氣都話埋過你知，唔到你話唔方便。換句說話，呢個係手機版on.cc，隨時隨地畀你掌握第一手消息。

如果你係秒秒鐘幾千萬上落嘅投資者，你更加會覺得on.cc係你嘅好朋友，因為Money 18去年底推出大受歡迎嘅免費即秒股票報價。老友記，喺呢一個瞬息萬變嘅投資市場，知得快，好世界，知得多，笑呵呵，手機睇報價簡直係一Phone在手，處變不驚！

有人可能會問，家陣係人都上網搵資料，點解要揀on.cc？呢一個問題，功夫茶想反問一下大家，網上資料有幾多係堅料？幾多係流料？虛擬世界有時真係幾虛㗎，真真假假撲朔迷離，之不過咁，on.cc有一個傳統新聞媒體做強大後盾，資訊由受過嚴格訓練嘅新聞從業員提供，準確性高人一等。畀你揀嘞，你寧願相信以訛傳訛嘅網上資料，抑或係信譽良好嘅東方報業集團旗艦網站on.cc？

學浸會大學傳理系助理教授杜耀明話齋，每一則網上即時新聞，經過新聞從業員徹底了解同分析，並非一般網上資料可比，令市民對新聞有更全面嘅理解。

講到呢度，不如提提大家一個技術性步驟。iPhone用戶只須透過App Store，Nokia Smartphone用戶只須透過Ovi Store，下載on.cc即時新聞程式，就可以享受盡知天下事嘅樂趣。下載步驟快捷方便，撳幾撳就大功告成。

喂喂喂，唔好忘記on.cc係有短片睇嘅，好多條獨家報道嘅猛料短片已經熱爆全城。譬如話，情歌王子曹格當街追打側田，點擊率高到爆燈。又譬如話，觀塘有「撞胸賤男」非禮女途人，短片一出，除咗舉世嘩然之外，更加協助警方火速拉人，鹹濕伯父最近罪名成立，判監半年。既然可以睇短片，on.cc絕對係先睹為快嘅一流平台。

總而言之，手機睇即時新聞，快靚正又夠貼身。唔想走寶？梗係快手快腳下載on.cc即時新聞程式啦！