進修咗一輪嘅楊立門睇落老成持重，仲戰意十足，前晚已經急不及待以候任常秘身份，出席由青年委員會主席陳振彬（Bunny）揸旗嘅青少年發展聯會慈善晚宴，未返工已經開始做嘢。晚宴上，娥姐都在場，楊立門好眼利，主動同前上司打招呼，不過當卓妮叫佢同娥姐合照嘅時候，佢就扭扭擰擰話：「唔使喇，影咗喇！」最後卓妮拉埋行會召集人梁振英兩公婆夾喺中間，兩人先肯影大合照，到底兩人係咪有心病，真係要問過佢哋兩個至知嘞。

不過娥姐顯然無受不和嘅傳聞影響，晚宴上興致勃勃拉埋主人家Bunny以手鈴奏出一曲《Twinkle Twinkle Little Star》搞搞氣氛。慈善晚宴合共籌得一百萬元，將會用作聯會屬下嘅德育發展中心作營運經費。

卓妮喺晚宴上仲見到民政事務局副局長許曉暉，許曉暉難得拖埋老公及囡囡出席，一家三口嚟張大合照，相當難得一見！