旅遊發展局主席田北俊嘅任期三月底屆滿，早前盛傳政府想換馬，甚至連田少前黨友、經濟動力林健鋒都覬覦呢個位。尋日立法會經濟事務委員會開會，請咗田少上去，一眾自由黨員出盡力發功，未開口就旅發局今年工作計劃提問，方剛先狂讚旅發局喺去年咁艱難，年尾都搞到客量升番晒，難能可貴，對零售飲食影響甚大。接着劉健儀仲加把口，借田少揶揄政府，話非常欣賞旅發局做嘅預算，盤數咁靚，肯定做咗好多節流；如果政府學習到旅發局處理財政嘅手法，一定減省唔少資源！
民主黨嘅劉慧卿見方剛、劉健儀為田少兜來兜去，忍唔住幫口直接問政府話，田少個位仲有幾耐做，點知在場得番署理旅遊事務專員林錦平，佢話唔評論事件，又話當局喺遴選人選時，會考慮旅遊策略。坐喺佢旁邊嘅田少見到大家咁畀面，唔尷尬之餘，仲報以微笑。記得○八年立法會選舉時田少講過，若然大家支持泛民，就投票畀劉慧卿，莫非兩人惺惺相惜？