日防夜防 家賊難防

據悉，呢位被朋友所累嘅禮賓府家務員，就係相中帶友人參觀禮賓府廚房、身穿紅白間短袖Ｔ恤嗰位肥哥哥，而事發日期係○八年十一月，當時煲呔曾離港赴秘魯利馬出席亞太經合組織領導人非正式會議見胡總，禮賓府虛空，防範鬆懈，間接造成今次事件。禮賓府有二十五個家務員，人工由一萬七千多元至逾二萬元不等，各司其職，據聞呢位家務員唔係花王或者廚師，而係一旦有貴賓到訪，負責斟茶遞水嗰個，聽講幾得煲呔曾歡心；如果傳聞屬實，煲呔曾真係要嘆句：日防夜防，家賊難防囉！

消息話，家務員係以公務員合約聘用，特首辦行政部門已按公務員守則，對呢位員工展開調查，暫時未知會有乜嘢懲處。按公務員守則，違規員工嘅懲處方式，可以係口頭警告、書面警告、譴責、扣人工到辭退，今次家務員帶友人返宿舍樓下開燒烤大會，本來不成問題，問題係禮賓府無明文規定，喺員工宿舍同禮賓府邸之間劃下清晰界線，要求員工不得逾越，成班「八十後」玩得興起，玩過隔籬，究竟應受乜嘢程度嘅懲處，正式係可大可小，要睇調查結果點判。

網民議論 禍因自招

今次「八十後」玩轉禮賓府，網民議論紛紛，有人懷疑禮賓府有嚴重保安漏洞，亦有人再次質疑煲呔曾嘅管治能力。一位網友好文采咁話：「一室之不治，何以天下國家？」即係話，煲呔曾連自己屋企都管唔好，點樣管治香港七百萬人？

最搞鬼嘅係，有心水清嘅網民，諗起發叔大年初二喺車公廟為香港求得下籤，籤文全文係：「君不須防人不肖，眼前鬼卒皆為妖；秦王徒把長城築，禍來禍去因自招。」解曰：內有家鬼，自身不安，家宅不安，求財不遂。牛年仲有廿日就走，估唔到煲呔曾都係避唔過，無論禮賓府平日點樣守衞森嚴，防止示威者潛入，最後都係徒勞無功，家賊難防，衰喺一個家務員手上，真係應晒籤文最後嗰句：禍來禍去因自招！