秋冬季節，最好食蛇進補。蛇肉含豐富蛋白質，中國人相信食蛇有抗寒去濕、通筋活絡作用，皮膚滑溜嘅「鯊魚女」陳細潔（Abbie）都愛上蛇羹，早前相約老友去中環閣麟街三十號嘅「蛇王芬」，大擦招牌蛇羹及海參花膠蛇腩煲。
「蛇王芬」開業逾半世紀，每逢秋冬之際，其招牌菜「五蛇羹」必定吸引食客大排長龍，Abbie試完都話暖胃醒神，本來凍冰冰嘅手腳登時暖笠笠，認真神奇！
老闆娘吳太話，蛇羹唔易煮，除咗蛇肉外，仲有加入木耳絲、花膠、雞絲及冬菇絲至惹味，以慢火燉足幾粒鐘後配上檸檬草及薄脆，有畫龍點睛之效，每碗盛惠七十蚊，閒閒哋日賣近二百碗。至於炆蛇腩煲，材料有香滑蛇肉、花膠同海參。花膠有養顏活膚功效，Abbie話愈食愈滋味。
卓妮