咦，好似有少少眉目嘞，機電署話喎，暫時可能或者應該同中石化無關。至於的士集體死火嘅真正元兇，暫時可能或者應該冇人知道。

假如你係的士司機大佬，聽見機電署咁含糊不清嘅所謂初步調查結果，你肯定唔會收貨，一定仍然思疑中石化賣嘅石油氣有問題。咁就頭痕到極，家陣出現咗兩個怪現象。

第一個怪現象：有氣冇車入。

即係咁，人人敬而遠之嘅中石化拍烏蠅，冇人夠膽幫襯，生意暴跌八成，以前每日大概有一千至一千三百架的士入氣，現時只有三至四百架左右。聽聞有車行實牙實齒講到明，唔准幫襯中石化，否則一旦死火，拖車以及維修費用由司機自己負責，車行一個崩都唔會出。你話吖，死火真相一日未查明，中石化肯定喊得一句句，即使嗌破喉嚨「冤枉呀大老爺」一樣冇人理。

第二個怪現象：有車冇氣入。

的士唔幫襯中石化，當然轉頭光顧其他氣站，結果就造成供不應求嘅失衡現象。的士司機目前日常最重要嘅工作係長時間排隊入氣，排呀排，等呀等，輪呀輪，好彩就話終於輪到自己入氣，一個唔好彩，氣站職員隨時會話，存貨沽清，明天請早。萬一真係入唔到氣，梗係奔波勞碌頻頻撲撲去其他氣站碰運氣再排過隊㗎啦。於是乎，的士司機根本冇時間接客做生意。

講到呢度，等功夫茶再數數手指，數下有幾多個輸家先。呢嗱，中石化拍烏蠅，輸！司機掛住排隊入氣接唔到客，輸！司機冇生意，即係車行冇收入，輸！至於懵盛盛一直未查得出死火真相嘅機電署，廢柴成咁，唔使多講，輸輸輸輸輸！

講開機電署嘅廢柴表現，應該冇人夠膽揈水髮大嗌「冤枉呀大老爺」，因為證據非常確鑿。舉一個例吖，舊年一個月內先後有三名病人送院期間由於白車死火而受阻，病人最終死亡，雖然死因庭裁定事主死於自然，但係法官點名批評，為救護車維修嘅機電署檢查不認真，署方撰寫嘅維修報告不可信，所以就提議消防處「換車房」，唔好再幫襯機電署。

如果你將白車死火夾埋的士死火兩件事一齊睇，相信你會得出一個印象，機電署係最死火嘅政府部門，維修又唔識，調查又唔掂，連累街坊街里人人輸到眼擎擎！

計功夫茶話齋，消防處冇錯真係要換車房，至於機電署自己，不妨試下換署長！