電影發展局尋日開記者會公布電影發展基金新措施，身為電影局主席嘅蘇澤光（Jack So）當然要現身撐場。不過，佢一坐低就話，「我今朝早剝咗八隻牙，所以嘴形硬硬哋，希望大家唔好見怪」，但就無交代整牙原因。之後，佢講咗短短幾句開場白就將個波交咗畀副主席，連原來應該由佢公布嘅新措施部分，都交埋畀委員王英偉介紹，自己就苦埋口面咁坐喺度，直至答問環節時有必要先發言。
王英偉事後同我哋講，Jack So唔係剝牙，只係修補有問題牙齒，但係一次過整八隻，所以擘大個口擘到牙骹都軟埋，正所謂牙痛慘過大病，電影局成員都好體諒佢嘅苦況，於是大家齊齊幫拖，等佢可以講少啲嘢。
Jack So近年無做打工皇帝，但公職就愈嚟愈多，佢除咗係電影發展局主席外，仲係貿易發展局主席，又係港區全國政協委員，工作應酬一樣咁忙，所以牙關緊緊，都要出席應酬飯局。