每逢煲呔曾出席立法會答問大會，社民連三子定必「大刑侍候」，掟蕉、粗口、謾罵……總之次次都要搞到休會或者畀立法會主席趕離場先甘心。不過，尋日嘅答問大會顯得格外平靜，何解？
話說上星期社民連嘅黃毓民同金融界立法會議員詹培忠喺特別財委會上「駁火」，粗口互罵，人身攻擊後，被外界強烈抨擊。同社民連一齊搞五區總辭嘅公民黨黨魁余若薇（Audrey）唔知係咪擔心社民連形象唔好會影響選舉結果，所以尋日開會前特意提黃毓民「唔好玩嘢」，黃毓民無奈回應：「得啦！」
黃毓民事後直認忍得好辛苦，因為佢聽到煲呔曾暗指立法會門外嘅請願學生係「敵人」時令到佢好火滾，但因為應承咗Audrey，最終決定「唔可以掟嘢咪走囉」！
黃毓民會後撞到揚言要喺總辭中「追擊」佢嘅白韻琴，佢仲主動行埋去打招呼，話選舉期間唔會發惡鬧女人。白姐姐事後話：「如果社民連以後好似今日咁文靜，我就唔使參選去反對議會不文明啦！」不過佢似乎唔多信黃毓民，仲補多句話：「佢話唔鬧我，但可以班馬嚟鬧我囉！」