本文重點
立法會議員梁劉柔芬（蘇菲）尋日一個鐘趕兩場忙到暈，話說南蓮園池尋日請咗台灣竹藝專家黃塗山嚟推介傳統竹藤編織藝術，喺志蓮做咗多年義工嘅蘇菲及潮屬社團總會名譽會長高佩璇特別抽空去撐場，志在推動中國文化嘅南蓮園池一啲都無求其，安排黃塗山即席顯身手，由開竹開始做起，跟住仲有工作坊教大家編織，成個活動差唔多要個半鐘先完成。
推介竹織藝術
咁樣就出事啦！事關活動兩點鐘開始，但蘇菲三點正要去到立法會出席答問大會，所以唔趕就奇。不過蘇菲好有義氣，睇晒成個示範、介紹埋啲藝術品先走。蘇菲話竹藝既環保又有創意，好值得向學生哥推廣，南蓮園池會搞工作坊畀老師參加，透過佢哋將竹藝帶入校園，有興趣嘅公眾人士可以去欣賞由即日起至三月底舉行嘅「傳統竹藤藝術」展覽，仲可以參加工作坊織埋一份。
蘇菲細個已鍾意編織，試過收集拜完神嘅香雞嚟編織，但依家就忙到唔記得屋企有無呢啲編織工藝品擺設。至於篤信佛教多年嘅高佩璇就鍾意竹嘅清雅，屋企同公司都放好多富貴竹，所謂「無竹令人俗」，加上竹容易打理，啱晒成日要出門嘅高會長。