沈教授尋日出席「無止橋慈善基金」開幕禮時，講起「八十後」就有感而發話，以前啲人經常批評班年輕人對社會事務漠不關心，但現在佢哋肯走出嚟表達意見，絕對係好事，況且佢哋爭取嘅嘢並非與自身利益有關，反映佢哋係真心關心社會，可惜被社會批評「過激」同「唔理智」，對呢班年輕人絕對唔公平，聽落沈教授好戥佢哋不值！

對於「八十後」用苦行及絕食方式向政府施壓，沈教授就覺得冇乜問題，只要用積極同和平方式去表達就得嘞，佢話：「七、八十年代都有學生因為釣魚島事件而絕食同貼大字報啦，我唔覺得有乜咁過激喎！」沈教授笑言，雖然自己後生時冇參與過絕食行動，但就認為年輕人咁做可以喺校園同社會喚起大家對時事嘅關注。唔怪得佢咁尊重中大學生自由表達意見啦！

陳仲尼反標籤年輕人

除咗沈教授之外，香港青年聯會主席陳仲尼（Rock）都為「八十後」平反，佢指身邊不乏八十年代出生嘅人，佢哋都有個人表達言論嘅方法，所以不能將所有「八十後」年輕人都標籤為激進。問佢覺唔覺得反高鐵班「八十後」嘅行為太過激進？阿Rock笑稱：「你睇我平時嘅言行，就會明白喇！」阿Rock平時談吐舉止咁溫文爾雅，反高鐵班「八十後」豈不是好激進？

同樣搞青年事務嘅菁英會主席施榮忻就認為，「八十後」被標籤為激進，係源於呢班年輕人對社會情況未透徹了解，只係花時間喺網絡世界裏浮浮沉沉，如果佢哋肯抽時間返回現實社會，多了解社會及中港兩地問題，問題就會迎刃而解。綜合以上政界內外人士嘅意見，睇落班「八十後」又唔係咁激進啫！