棋哥早前出席會展一個研討會，講起東非之旅滔滔不絕，此行仲有棋嫂及香港僑界社團聯會會長余國春伉儷，團友歲數有番咁上下，但行程夠晒紮紮跳，暢遊肯尼亞及坦桑尼亞翠綠大草原。棋哥話，一行人坐住架四驅車，聽見對講機傳來另一導遊「報料」，馬上驅車窮追不捨，一個下午睇勻長頸鹿、斑馬、狒狒、羚羊、馬尾牛及鴕鳥，抬頭又望見天上有一抹彩虹，奇景處處，其樂無窮。

陳永棋揸機影金錢豹時，無意中激嬲曬緊太陽嘅大象，大象發怒衝向佢哋。

放大圖片

影相激嬲大象追車

最令棋哥驚訝係一頭匿藏樹上乘涼嘅金錢豹，因為隱藏得好，團友幾乎走漏眼。隻豹隔住樹葉虎視眈眈，銳利目光令人不寒而慄，棋哥把握機會影多幾張相，忽然驚動草原上一頭雄性大象，發爛渣衝向團友，千鈞一髮之間，大象突然急煞停咗落嚟，何解？棋哥話，原來動物視車輛為一件龐然巨物，唔敢輕易挑釁，咪知難而退囉，好不驚險！

奔馳大草原後，團友參觀埋睡火山，個火山口有幾個香港島咁大，壯觀到極。獵奇六天後仲有下場，眾人跳上郵輪暢遊印度洋，途經東非馬達加斯加等地。咁此行有乜好嘢食呢？棋哥話東非保護野生動物，咪旨意擦動物大餐，菜式係正常西餐，但非洲嘅炒飯都唔錯，可媲美港式炒飯。

大草原車路不通，要靠乘坐單引擎飛機才可抵達，左起：陳永棋、陳太、余國春太太及余國春。	金錢豹匿埋喺樹上乘涼，一知道行蹤畀遊人發現，即時目露兇光。	大草原上乍現一抹彩虹，恍如人間仙境。

40服務生招呼4人

遊東非團費唔平，棋哥唔肯講實數，只露出肉赤表情話：「好貴，好貴！」貴喺邊呢？原來睇野生動物要坐單引擎飛機飛抵人迹罕至嘅大草原，油錢好襟計。坦桑尼亞草原上有超豪酒店，棋哥都住咗兩晚，酒店派出四十位服務生服侍四位貴賓，收費幾多？一句講晒，幾「乸脷」！

卓妮