唔知同人民力量封鎖大廈出口有冇直接關係，警方終於第一次捉到人。被捕疑犯被指鬼鬼祟祟喺事發現場附近出沒，或者同案件有關都唔定。可惜吖，警方暫時冇辦法確定，而根據曾蔭權嘅口脗，誤中副車嘅可能性係存在嘅。

煲呔曾有乜嘢口脗呢？佢喺事發之後係咁講嘅，再次發生擲鏹案令人氣憤，警方已經懸紅緝兇，希望市民幫警方盡快破案。

呢嗱嗱嗱，既然已經有人被捕，如果係真正元兇，煲呔曾冇可能繼續呼籲市民幫拖，亦都冇必要重提懸紅緝兇。計功夫茶話齋，除非連曾蔭權都傻更更唔知內情，否則成件事應該未完，話唔定再一次走得甩嘅變態狂徒仍然匿埋一二角陰陰嘴笑，笑警方無能，笑政府戇居。

唉，假如的確係咁，可愛又可敬嘅香港人同時又好可悲。喂，功夫茶都唔記得係第幾次咯，一時又話旺角，一時又話銅鑼灣，今次又殺入去遊客必到嘅廟街，仲未計其他各區零零星星類似個案。警方每一次都係老鼠拉龜，破案能力低到令人懷疑，香港警務人員係咪淨係識得拘捕手無寸鐵嘅示威人士？係咪任得喪心病狂嘅大奸大惡之徒逍遙法外？今次叫做醒咗少少，名義上閃電拉人，實際上係點未有人知。萬一張冠李戴拉錯人，咁就醜死怪咯！

當然啦，廟街出事之後例牌有人要求安裝天眼，更加有食肆老闆希望政府容許佢哋安裝簷篷，擋得幾多得幾多。即係咁，安裝天眼以及簷篷唔係話唔好，問題係，擲鏹狂徒有手有腳識走位㗎，係咪全港十八區大街小巷一律都係咁做呢？天眼要裝幾多？簷篷要裝幾密？所以話啫，任何防範措施純粹好過冇咁解，最切中要害嘅關鍵始終係要破案捉人，否則即使你將全香港用膠袋打包，依然永無寧日。

事到如今，莫講話鏹魔襲人令到曾蔭權話氣憤，其實香港人對於一籌莫展嘅師兄師姐同樣覺得好忟憎。市民減薪裁員，警方逆市加薪，如果加完人工之後表現出眾，個個變身神探伽俐略，納稅人條氣都話順番少少啫。可惜唔係喎，鏹水彈掟完一鑊又一鑊，小市民傷完一個又一個，神探伽俐略完全唔見，傻豹烏Sir Sir就好多件。

點都好啦，功夫茶都有必要加把口，孖住煲呔曾呼籲市民幫警方盡快破案。冇辦法，人人為我，我為人人，傻豹既然茫無頭緒，市民惟有積極幫拖，當係自救都好吖！