特區政府成日叫人打豬流感疫苗，不過坊間憂慮有副作用，所以反應冷淡。前民政事務局局長何志平嘅太太胡慧中都話，佢一家三口無意思去打喎，不過佢哋唔係驚副作用，只係佢哋已經免咗疫啫。
肥平一家三口前晚出席一個公開活動，今年九歲嘅何家千金何淦璇天真活潑，喺現場不停撩卡通人物同佢玩。何太話，囡囡農曆新年後就要考試喇，趁依家功課冇咁緊張陪佢玩多啲。
為人父母都着緊子女健康，依家豬流感橫行，但錫囡囡錫到燶嘅何太話唔使帶囡囡去打防疫針，原來淦璇前排不幸中招，之後更傳染埋畀肥平同佢，換言之一家三口都患過豬流感，三個都免咗疫咁話。何太反而最擔心萬一病毒變種，可能會使疫症影響到全世界。
話時話，有專家話中過招唔保證無下次，而且第二波疫症隨時殺到，或者何太都係做足防疫措施好啲，小心使得萬年船嘛！