前政務司司長許仕仁年前兩隻眼都患上白內障，需要入院做手術，尋日我哋喺馬場撞到佢，問佢依家對眼情況點樣，佢話白內障就好番晒喇，但青光眼就冇得斷尾，唔惡化已經算好彩。問佢點解搞成咁，佢太太就搶住答：「咪做嗰兩年搞成咁囉！」不過肥龍就極力否認，話呢個病唔關做嘢事喎。「嗰兩年」係乜？如果唔係講緊做政務司司長嗰兩年，又會係乜？
肥龍雖然青光眼未愈，但冇影響到佢養馬睇馬嘅眼光，佢有份嘅皇仁舊生團體馬「福龍」，尋日以次熱姿態跑出，贏得超過二十七萬元頭馬獎金。
肥龍以前一有假期就會飛去歐美或日本睇歌劇兼食好嘢，不過今次嘅聖誕新年假期，佢去開嘅地方都刮大風雪，為免凍親都係決定留港。肥龍又自爆一向都信中醫多過西醫，因此即使佢係年過六十五歲嘅高危人士，都冇響應政府呼籲打豬流感針。好彩佢依家已經冇做高官，否則就要被迫啪針，隨時冇病都會打到病！