港大公布荷包大縮水，但無損校長徐立之嘅心情，尋日兩大龍頭大學──港大及中大搞「第七屆校長盃足球賽」，徐立之同中大校長劉遵義雙雙主持開球禮，但徐校長腳法反而唔及老佢一截嘅劉校長，原來佢早前喺乒乓球比賽中受傷，要暫時掛靴。
劉遵義「省」中無辜
場比賽搞咗六年，港大一向輸多贏少，熱愛踢波嘅徐立之本來諗住踢埋一份，一雪前恥，可惜月前打乒乓球賽時竟然不慎整傷膝頭，尋日無緣落場為港大「報仇」嘞。結果比賽一比一打和，雙方不分勝負。
劉遵義都錫身無落場，但佢主持開球禮時，唔係幾識踢波嘅佢竟然一腳「省」中場邊工作人員，好彩只踢中對方部相機，無人受傷，劉校長老而彌堅又一例證。
