不過人算不如天算，原來《通勝》話，本月廿七日星期三最適宜就係掃走晒啲垃圾同污糟嘢，喺生肖同方位方面亦正係「沖羊煞東」，預示五名辭職議員之中，分分鐘會輸足三席甚至一鋪清袋，佢哋今次真係捉蟲囉！

政界同學者一般估計，五名辭職議員當中，以新界西嘅社民連陳偉業、九龍東嘅公民黨梁家傑同新界東嘅社民連梁國雄，最有機會不能當選重返立法會，估唔到連《通勝》都係咁講。《通勝》話本月廿七日即農曆十二月十三日，喺生肖上係「沖羊」，即係對羊年出世嘅人最不利，咁啱喺五五年出生嘅陳偉業就係屬羊，可以話係唔老嚟之極，唔怪之得佢成日話想換人參選喇。

《通勝》：宜掃走垃圾

《通勝》又話，當日喺方位上係「煞東」，即係最不利東邊，按立法會五大地方選區劃分，就最不利九東同新東。事實上泛民喺上屆立法會選舉，整體得票最差正係呢兩區，真係唔使問過師傅都知濕滯。至於當日最適宜同最避忌做乜嘢呢？《通勝》話，「宜」嘅有解除、掃舍、祭祀同教牛馬四樣，「忌」嘅就係「餘事勿取」，即係除咗嗰四樣就乜都唔好做。其中解除同掃舍，都有掃走啲垃圾同污糟嘢嘅意思，選擇喺當日炒人魷魚、踢走晒啲牛鬼蛇神，確實相當適宜，但如果係自行辭職再祈求選番入議會，就認真大吉利是。因為當自己係垃圾同牛鬼蛇神，好極都有限喇。