要數香港最遠近馳名嘅地道飲食，雲吞麵實榜上有名。唔少城中名人富豪平時食慣鮑參翅肚，但都會被一碗小小嘅雲吞麵所征服。好似信興集團創辦人蒙民偉，最鍾意去「正斗」粥麵懷舊一番。
「正斗」粥麵專家老細何冠明話畀卓妮聽，蒙叔由舊舖開始已經幫襯好多年，每個月都會嚟幾次，次次必食雲吞麵、叉燒包同埋蝦米腸粉。蒙叔當正佢係子姪，如果有咩招呼唔到，都會唔客氣畀意見㗎！
「正斗」雖然只得十三年歷史，不過何冠明父親創辦嘅何洪記，係本港雲吞麵界四大家族之一，成立至今已經六十四年，由最初嘅街邊檔到依家銅鑼灣霎東街，一直街知巷聞。
「正斗」系出名門，水準自然有番咁上下。佢哋嘅乾炒牛河都有好多捧場客，難怪攞到好多大獎啦！明哥話佢哋堅持沿用最古老方式，全部真材實料烹製而成，確保質素有保證。
卓妮