本文重點
台灣時裝界第一品牌夏姿（Shiatzy Chen）進駐香港近六年，受到愈來愈多名媛青睞。香港海洋公園保育基金主席陳晴（Judy）前晚着得好高貴優雅，令人忍唔住睇多兩眼，原來件靚靚晚裝又係Shiatzy Chen嘅作品。
中國風唔老土
Judy以主人家身份為大熊貓基地震後重建基金籌款，自然要隆重其事裝扮一番。佢條魚尾晚裝裙係由粉紅色牡丹刺繡圖案構成，加埋低胸同貼身嘅剪裁，令Judy渾身散發着女人味。
Judy同卓妮講，佢呢條裙唔係因為出席呢個活動而新買嘅，已經係幾年前嘅貨色，佢本身熱心保育工作，所以一件衫會循環着幾次，都係一種減碳環保嘅生活方式。
Shiatzy Chen係設計總監兼老闆娘王陳彩霞嘅英文名，成立至今已三十年。佢哋嘅特色係散發着中國風，但又唔老土。自從六年前喺半島酒店開第一間香港分店後，依家已有四間咁多。
卓妮