就喺討論高鐵撥款前夕，尋日立法會已經有兩個議員嗌大交，反對撥款嘅黃毓民同支持撥款嘅詹培忠炒蝦拆蟹嘈到拆天。比較好彩嘅係，呢兩位五十後嘅仁兄始終叫做識大體，嗌完交即時握握手做個好朋友，為咗唔想教壞細路而第一時間冰釋前嫌。之不過咁，一葉可以知秋，相信今日嘅表決過程一定充滿火藥味。

香港係一個自由社會，你有權支持，佢有權反對，冇乜嘢大不了。問題係，喂，萬一成件事流於拖拖拉拉爭持不下，高鐵工程無法上馬，莫講話工人冇工開，連香港整體利益都蒙受損失。大家不妨幻想一下，中國各省各市都可以利用時速超過三百公里嘅鐵路飛馳往返，一到香港，哎吔，該煨，唔可以繼續高速，只可以蝸步蟻躝，你話幾咁丟人現眼呢？

特區政府早於○七年提出十大基建，目前有幾多項開工大吉？講出嚟真係醜死怪，淨係啟德郵輪碼頭以及港珠澳大橋叫做進入施工階段，其餘八大基建仍然紙上談兵。唔好忘記，啟德郵輪碼頭又好，港珠澳大橋都好，其實都係超過十年嘅構思，即係話，議而不決、決而不行嘅龜速官僚唔蹉跎歲月十年八載係唔安樂嘅。其餘八大基建咯喎，計功夫茶話齋，真係有必要搵人向發展局局長林鄭月娥日哦夜哦：喂，開工喇喂；喂，開工喇喂；喂，開工喇喂……

尋日，建造業總工會哦咗一哦，佢哋訪問過一萬四千幾個建造業工人，發現七成七就業不足，每月開工少於二十日，當中兩成更加係食白果。工人冇工開，等於冇飯食，所以建造業總工會一方面要求高鐵上馬，另方面又敦促所有基建工程盡早啟動。

講到呢度，冇辦法唔講番高鐵。家陣點解咁多人反高鐵？其中一個主要原因係政府冇解釋得清清楚楚，事前諮詢糊糊塗塗。呢嗱，造價最初講係三百幾億，失驚無神變咗接近七百億，係人都思疑你浪費公帑啦！

即係咁，反高鐵嘅人並唔係全盤反對興建高鐵，佢哋其實認同香港需要一條高速鐵路，只不過反對選址西九、造價太貴同埋摧毀石崗菜園村咁解。如果特區政府事前做好溝通工作，釋除所有疑慮，邊會搞出深層次矛盾呢個大頭佛吖！

唔理今日高鐵撥款結果係點，功夫茶可以好肯定咁話畀大家聽，只要林鄭月娥之流嘅官僚繼續閉門造車，唔識得走入群眾聆聽社會聲音，一味以為大權在握嘅五十後可以完全漠視八十後，未來所有大型工程將會一次又一次爭拗不休。基建拖完又拖，工人日哦夜哦，香港唔沉淪就難咯！