立法會內務委員會尋日開特別會議討論粵港經濟合作，點知變成議員大翻政務司司長舊帳嘅戰場，劉慧卿即場投訴，唐唐星期一去荃灣出席政改諮詢研討會時，示威者被警方「又鈎手又扯頭髮」，遭受過分武力對待，要求唐唐交代，而「長毛」梁國雄亦指唐唐喺雷曼迷債事件中責無旁貸，叫唐唐承諾會上立法會相關專責委員會接受聆訊。
劉慧卿突襲唐唐，翻其舊帳，講到停唔到嘴，連十幾個泛民議員至今都攞唔到回鄉證，無法邁過深圳河，都入埋唐唐數，批評議員返唔到內地，點講粵港合作呀？唐唐話，會喺可行情況下向中央爭取讓議員返內地訪問，但係喺警方上星期過分使用武力問題，佢就企硬，話警方一定會以最適當嘅手段維持秩序。至於調查雷曼迷債事件，唐唐強調政府會配合，不過，即時畀長毛搶白指港府根本無合作過，連部分相關文件，都拒絕公開畀議員過目。總之議員呢排慣性失控，都唔理討論內容有否超出範圍。