社會對學生嘅要求愈嚟愈高，依家嘅大學生唔只要讀書好，眼界仲要夠廣。嚟自唔同國家嘅大學生尋日喺香港出席模擬聯合國會議，中文大學候任校長沈祖堯一出場就話好羨慕班後生仔有個咁好嘅平台同人交流，仲講笑話佢細個嗰時只可以同朋友交流是非同玩具，沈教授認真幽默！
沈教授話佢最難忘係第一次坐飛機。佢話小六考完升中試後，由於考得唔錯，而且當時未夠十二歲嘅小朋友買機票有半價，所以屋企人就獎佢搭飛機去馬來西亞探Auntie。第一次搭飛機嘅佢滿心歡喜，誰不知架飛機撞正大氣流，突然急降五百呎，好多人仲因為咁而撞親個頭添。不過佢就話冇因為嗰次嘅經驗而患上飛機恐懼症，仲話飛機愈搭愈密喎。
對於有醫務人員因為打咗流感針而令到隻腳行唔到，沈教授就話自己兩個星期前已經先拔頭籌打咗針，不過就冇發燒冇肌肉痛，叫大家唔使恐慌咁話。