旅發局負責推廣香港旅遊，掌握資源每年高逾七億元，唔少活動都同零售批發、旅遊、飲食、酒店同運輸業界有關，Jeffrey想截田少胡，唔知係咪同經濟動力部署開拓功能組別議席有關呢？睇番經濟動力近期嘅連串舉動，的確雄心勃勃，先係力谷會董胡兆英成功爭奪旅遊業議會主席，搶佔自由黨傳統地盤，再嚟成立「工商界政改動力」，飛起自由黨，想取代自由黨成為工商界政壇代言人嘅意圖相當明顯，依家又傳Jeffrey想取代田少入主旅發局，連串事件睇落甚有關連喎。

田北俊望繼續做主席

消息話，Jeffrey已向政府當局傳達訊息，表明有意亦有能力擔任旅發局主席；經濟動力依家係立法會內最強勁嘅護航機器，Jeffrey突然毛遂自薦，令港府官員錯愕之餘，亦感到為難。事關按照公職人員「六六制」，即擔任公職不多過六個及同一職務不長過六年嘅原則，田少○七年先至執掌旅發局，一般可獲續任至少一屆三年。更何況田少入主旅發局後，旅發局一直平安大吉，即使喺金融海嘯衝擊下，○九年來港旅客數字亦有望力保不失，田少無功都有勞；如果政府喺缺乏有力理據下唔再委任田少，等如挑釁自由黨，相關官員又點會想無端端捲入呢個政治漩渦呢？

我哋打電話問Jeffrey，佢否認想爭旅發局主席個位。問佢有無興趣執掌旅發局，佢就話唔答假設性問題。

田少就同我哋講，未聽聞盛智文同Jeffrey有機會接佢棒，而佢自己喺過去三年好投入旅發局工作，好似推動美酒佳餚節同除夕煙火倒數咁，二○一○年旅發局仲會重辦國際龍舟賽，佢希望未來三年可以親身督導落實措施，為香港經濟繼續出力。言下之意，即係田少都希望繼續做落去。至於盛智文同Jeffrey係咪旅發局主席理想人選，田少話，人選由政府委任，佢就唔置評嘞。

其實政黨政團想攻打入主旅發局地盤，無非想擴大政治版圖，增強實力，但講到底都要睇可以攞到幾多立法會議席；大家不妨睇吓二○一二年戰果如何！