本文重點
有「趙樓神」之稱嘅長實集團執行董事趙國雄出名形象百變，過去賣樓分別扮過大將軍、中東油王、醫生等角色，維肖維妙。尋晚佢出席長實周年晚宴時穿着服飾亦別具特色，就係充滿中國傳統藝術味道嘅南京雲錦。卓妮見趙國雄件紅色雲錦織上金龍圖案，甚有帝王風範，氣派不凡，紅色亦意頭十足。
具一千六百年歷史
趙國雄有次應邀到南京食飯，首次認識到雲錦，結果一見傾心，於是好豪爽咁一次過製造兩件衫，尋日身上着緊嘅係其中一件，另一件係藍色印有老虎圖案，佢話就到虎年，到時着出來就啱晒時候喎！趙國雄話，織一幅雲錦布料約三個月，另外裁剪需時兩星期，製作過程一啲都唔簡單。價錢亦一啲都唔平，郁啲都要萬萬聲。
至於雲錦嘅歷史亦難唔倒趙國雄，佢話雲錦係元代產物，直到明朝才發揚光大。卓妮都翻查資料，雲錦係一種中國傳統提花絲織錦緞，至今已有一千六百年歷史，圖案絢麗、紋飾華美如天上雲霞而得名，與四川蜀錦、蘇州宋錦及廣西壯錦並稱為中國四大名錦。趙國雄希望呢種傳統民間藝術可以流傳下去。
卓妮