二百萬起「遊樂場」

尋日以陳媽媽命名嘅「東華三院鄒蓮女士長者日間護理中心」舉行開幕禮，請嚟社會福利署署長聶德權及東華主席李三元主持儀式。身為主人家嘅三太同姐姐婉清帶埋超蓮一齊參觀中心，希望畀受助老人家一個有Home-feel嘅舒適「遊樂場」以圓母願。

陳媽媽生前兒孫滿堂，但見到無人照顧嘅長者要住老人院都會忍唔住留下同情眼淚，所以陳媽媽仙遊之後，三太同兄弟姊妹決定將媽咪剩低嘅錢回饋老人服務。李主席話香港愈嚟愈老化，老人服務需求好大。本身係東華總理嘅三太話東華辦慈善好有經驗，所以今次搞老人中心佢都好放心，唔使問賭王意見。

老人中心分開好多個部分，有電腦、麻雀室、健身器材、視覺感官區，仲有唔同課程玩，照顧晒動靜皆宜嘅老朋友。中心可以服務六十幾個老人家，東華都好留意有無其他地方適合做中心，希望服務多啲長者。

李三元（後排左）陪三太（後排右）問候老人家。 （楊歡成攝）

陳媽媽鄒蓮（右）生前關心老人家，長者中心亦以佢個名命名。 （資料圖片）

超蓮遵循外婆遺訓

一路陪住媽咪參觀嘅超蓮，就大讚婆婆呢二百萬花得好有價值。超蓮同啲長者有傾有講，仲同姨媽一齊學摺毛巾花，玩得不亦樂乎。超蓮話自細就跟住婆婆大，個「蓮」字仲係跟住婆婆個名改嘅添，所以兩婆孫感情好好，細個有親咩事仲會搵婆婆做擋箭牌添。

依家喺大學讀經濟嘅超蓮仲話婆婆教佢做人要「頂得住天對得住人」，佢自問都做到，好似傳佢有男朋友，佢就堅持否認，仲話今次講得好硬，因為真係唔係，至於細佬猷啟有個靚女朋友，超蓮就話細佬遲吓要去美國讀書，小情人要兩地分隔，不過始終都係細佬嘅私事，所以超蓮講咗兩句就收口，果然做到婆婆遺訓。

卓妮