港人好飲紅酒，把酒談歡更係時尚生活品味。政界都有唔少紅酒癡，前立法會會計界代表李家祥月前到訪美國有名葡萄酒產區Napa Valley，狂掃一批紅酒，話要珍藏十年至捨得飲。
Eric年前淡出政壇，專心做香港體育學院主席，但工作量唔算多，大把時間歎世界。Eric早前現身商場報佳音，大爆兩個月前暢遊美國東西岸，仲去埋加州Napa Valley品酒。該處山谷有三百多家酒莊，盛產優質葡萄酒，吸引無數紅酒愛好者。
既然入到寶山，無理由空手而回，Eric係咁易掃咗大批靚酒，出自邊個酒莊就唔講嘞，總之價錢公道喎。Napa紅酒較法國波爾多紅酒味道微甜，較易入口，Eric諗住珍藏十年，相信味道會更香醇。咁下站去邊呢？
Eric話，計劃今年玩轉歐洲，又會去品嘗俄羅斯鼎鼎大名嘅魚子醬，再去埋夏威夷。咁貪玩其實有原因，Eric話趁自己仲行得走得，一於行萬里路增廣見聞喎。
