尋日香港精英運動員協會喺沙田搞咗個籌款活動，唔少人都去撐場，當中包括發展局局長娥姐林鄭月娥，娥姐仲好豪咁喺香港同中國運動員嘅義賣攤位上，花咗一千蚊買咗兩件小禮物。不過娥姐買完禮物之後，仲喺會場度四圍望，後面仲有個好生面口嘅後生仔跟住添！原來此人並非別人，而係娥姐嘅大公子，娥姐係咁四圍騰，就係為咗幫囝囝買件由香港桌球手、「神奇小子」傅家俊親自設計嘅Ｔ恤，果然係廿四孝媽媽！
娥姐話佢哋全家都係桌球迷，事緣囝囝喺英國讀書之後就迷上咗桌球，後來仲感染埋細佬同爸爸。娥姐為咗同個仔有多啲共同嘅話題，亦湊興一齊去睇桌球比賽，睇睇吓自己都變埋粉絲。
娥姐一知傅家俊會出Ｔ恤，就帶埋囝囝嚟捧場，並且一口氣買咗三件，送畀兩個囝囝同老公。不過尋日娥姐一家嘅偶像傅家俊就無親身出現會場，搞到攞唔到簽名嘅囝囝有啲失望；不過娥姐就即刻安慰佢話，下次見到傅家俊一定幫佢攞簽名，囝囝就即刻笑番晒，一幕母慈子孝，不知幾溫馨！