01/01/2010

政情:肥亨聖誕上京探細女

今個聖誕節及新年假期好多名人外遊,好似中策集團主席馬時亨,之前就同太太王培琪及大女露明飛去北京,探望正在清華大學修讀課程嘅細女露玲,一齊歡度白色聖誕節。

不過,白色聖誕背後係有代價嘅,點解?肥亨話北京氣溫一直持續零下十幾度,凍到騰騰震,但可以一家人齊齊整整過節,都係值得感恩嘅。

話說肥亨出發去北京前,都不忘各方好友,特別送上台灣江記老店嘅香脆杏仁豬肉紙,當做聖誕禮物,仲話早前去台灣試過呢隻豬肉紙之後,真係令佢一試傾心,簡直係食到不能自制喎,差啲就影響佢嘅減肥大計。

○九年話咁快就完結,回顧過去一年,肥亨過得好充實,由高官搖身一變成為大學教授外,又主持電台節目與年輕人分享人生經驗,仲做埋中策集團主席添,當然仲有嘅就係唔少得做運動Keep fit 啦!