本文重點
泛民今日發起遊行爭取普選，但泛民山頭自從插多咗社民連呢支旗後，內訌互罵，紛爭不絕。早前社民連開記者會揚言要全力搞五區總辭，唔會再夾錢同泛民其他政黨搞聯署活動，所以社民連並非今次元旦遊行嘅發起團體之一，揸旗嘅係民主動力同二十名泛民議員。發起人之一嘅何俊仁就話社民連事前講好會行喺遊行隊伍最後面，不過近日有網民呼籲社民連支持者遊行時「走在最前線」，質疑是否想分文不出就「騎劫」遊行。
民主動力召集人蔡耀昌表明，出錢同出鏡率成正比，佢話遊行應由發起人行頭，呼籲其他有意參與遊行嘅團體尊重大會。其實，社民連都唔止一次騎劫泛民行動，好似政改諮詢方案公布當日，泛民一早就講好齊齊拉隊上政府總部抗議，但社民連三子就同泛民議員各行各路，聯同網民率先上禮賓府示威。
及後泛民再就政改方案發起車輪式遊行，社民連藉此公開向民主黨施壓，遊行時挑釁高呼「二○一二雙普選，民主黨，預埋你；何俊仁，站出來」，逼當時尚未表態嘅民主黨參加五區總辭。
包含其他訴求湊人數
面對社民連連串對抗性嘅挑釁，民主黨內早前針對元旦遊行策略亦召開會議，決定遊行時盡量避開社民連支持者，即使對方肆意挑釁仍堅持罵不還口，以免中計再畀機會社民連玩寸個Party。不過，民主黨內部已有共識，如果對方堅持粗口相對，民主黨議員將不會喺五區總辭時助選。
社民連嘅抗爭方式一向較粗暴，過往亦曾喺衝突中整傷立法會保安，民主黨可能擔心今日遊行若發生亂子，公眾會將責任怪喺主辦單位身上，所以民主黨成員遊行時除咗繫上大會指定嘅黃絲帶外，同時會繫上綠絲帶以資識別。
雖然今日遊行嘅主題係政改，不過泛民為求壯大聲勢，不惜號召各種訴求人士湊數 ，變為炒雜錦般，相信遊行主題最終會喺一片混亂聲中掩蓋。