新年伊始，過往有啲咩嘅壞習慣好趁機改咗佢。公民教育委員會主席兼和富社企會長李宗德（Joseph、圖）就比其他人行早一步，事關Joseph聖誕節假期嘅時候，終於的起心肝同屋企人一齊去旅行。
Joseph就話佢之前實在係太忙，好少時間陪屋企人，已經有成十年無同佢哋一齊旅行。雖然太太同囡囡都體諒佢，但Joseph始終覺得有愧於屋企人，所以聖誕節期間終於狠下心放低所有工作，陪屋企人去日本大阪行下，順便可以叉下電。
Joseph話雖然今次只係玩咗嗰短短三日，但成個感覺就相當舒服，淨係唔使聽到關於公務嘅電話，已經可以輕鬆好多，睇嚟Joseph真係要去多啲旅行先得嘞！
但Joseph就指今次旅行都仲係未夠圓滿，因為已經結咗婚嘅大女夾唔到時間一齊去。不過唔緊要啦，Joseph已經踏出一個好開始，將來總有機會全家人一齊旅遊享天倫！
卓妮