卓妮尋晚先去醫學會派對湊熱鬧，學會特別邀請一位漫畫家到場獻技，見醫學會會長謝鴻興同行政會議成員「金刀梁」梁智鴻好有興致，一人畫咗一幅，謝鴻興望住自己幅畫好滿意、好開心咁，嗰一刻竟然好似回復小學生時嘅模樣；金刀梁亦好滿意自己嗰幅畫，因為畫到佢無乜皺紋喎！至於新年願望，鴻興希望政府快點推動醫療公私營合作，而金刀梁就希望大家身體健康。

CY扭傷要醫生扶上台

卓妮同場又見到行路趷趷吓嘅行會召集人梁振英（CY），要陳以誠及周伯展醫生扶上台，原來CY早前同家人去北海道滑雪時不慎扭傷左腳，幸好無乜大礙，尋日仲帶埋太太青儀、大仔傳昕、二女齊昕及細女頌昕一家五口出席派對，認真畀面。CY笑稱，咁多醫生在場，一啲都唔擔心腳傷喎。過往好少見到CY一家咁齊人出席活動，據講佢三個仔女已分別喺外國讀緊中學同大學，難得一齊回港享天倫。

醫學會派對上，立法會議員葉劉淑儀都係座上客，佢帶埋放聖誕假回港嘅女兒榮欣出席。今年讀大學二年級嘅榮欣話，平時都有做網頁設計兼職賺外快，得閒又會做義工協助貧民起屋，讀書生活相當充實。

發叔訂定超級長餐枱

去完醫學界派對，卓妮轉過頭又去發叔喺半島酒店舉行嘅家庭聚會，發叔幾個仔女同八個孫仔孫女都到齊晒，三代同堂，加上其他親戚朋友共五十多人，發叔要預訂兩張超級長餐枱先至坐得落，大家難得一齊共度除夕，認真開心。發叔同大仔劉業強嘅新年願望係希望身體健康，香港安定繁榮，而發嬸就話希望自己青春常駐喎！

卓妮