唉，醉駕害人，影響一生，可能講得太多啩，所以好多司機聽到麻木，通宵劈酒之後竟然夠膽死坐上司機位開動引擎風馳電掣。等功夫茶不厭其詳苦口婆心囉囉囌囌講多一次，醉駕害人，影響一生……如果想印象深刻少少，不妨加強語氣再講過，醉駕害人正ＰＫ，影響一生好可悲！

尋日係諸志成「頭七」，諸家親友以及學校師生幾百人去到車禍現場順利邨利安道獻花拜祭，場面當然哀傷到極。尤其係諸太放低一支白玫瑰嘅時候，嗰一種椎心泣血，簡直係比死更難受。親友師生陸陸續續獻花，鮮花陣長達十幾公尺，可想而知諸志成係幾咁受愛戴。

哀傷還哀傷，有一件事功夫茶覺得十分荒謬。二十四歲肇事司機涉嫌醉駕闖禍之後，警方係就係將佢拘捕歸案，點不知，即日獲准保釋，到明年六月先至有需要返警署報到，竟然唔使停牌，可以繼續揸車！

嗱嗱嗱，你話乜嘢世界吖？首先，警方調查一單完全唔複雜嘅車禍，使唔使半年時間咁長呀？咁嘅龜速調查進度，警方唔覺得自己失敗，市民都覺得瘀皮。其次，喂，當你真係有必要慢慢研究左查右查，肇事司機既然係戴罪之身，點解可以容許佢繼續揸車呀？雖然話香港奉行「假設無罪」嘅司法原則啫，被告一日未定罪，佢一日都係清白，問題係，停牌唔算定罪喎，只不過係以策安全嘅做法。打個譬喻，你涉嫌謀殺，你還押監倉，冇人話已經定咗你罪，只不過暫時失去自由，避免有人受到傷害咁解啫。

難怪諸太喺電台節目泣不成聲，批評警方冇畀疑犯一個合理警惕。諸太又話，意外後幾小時司機已經可以保釋，好似乜事都冇發生過，六個月之後先至重提舊事，警方至少應該畀司機知道犯錯，保釋期間唔應該有駕駛執照。

可能有人會話，警方係冇權吊銷駕駛執照嘅，只有法庭先至有權咁做。呢嗱，漏洞就喺呢度嘞，警方要遲至半年之後先至調查完畢吖嘛，到時先至將司機告上法庭吖嘛，咁咪出現一個恐怖真空期囉，令人擔心酒氣四溢嘅私家車再一次成為導致家破人亡嘅殺人武器。

即係咁，政府一係設法堵塞漏洞，警方一係提高辦事效率，盡快將醉駕殺人嘅元兇交畀法庭釘牌。如果任由荒謬執法持續落去，功夫茶惟有衷心祝福特區官僚過馬路平平安安，千祈唔好遇到揸車橫衝直撞嘅醉酒佬！