大學工作有幾辛苦，問吓城市大學校長郭位就知道，郭校長○八年五月正式嚟香港履新，到依家先年幾，但已經示範咩叫「一年白頭」，郭校長話，佢以前無咩白頭髮，就算係郭爸爸，都係到咗七十歲先有白頭髮，但佢依家六十歲都未夠，嚟咗香港之後，啲白頭髮就係咁生出嚟，雖然唔似「任總」任志剛咁做咗白頭佬，但都令郭校長睇上嚟加添咗幾分滄桑。
郭校長尋日同記者講起，要管理成間學校真係唔容易，由學校行政、未來發展、籌款等都要一腳踢，好似啱啱過咗嘅聖誕節咁，本應好好慶祝順便利用假期休息一吓，但佢都要同校董開馬拉松式會議，真係想抖吓都難，唔怪得郭校長嘅三千煩惱絲，都慢慢由黑色變成白色。
今日係大除夕，係時候總結一吓一年嘅工作，郭校長話，過去一年城大發展理想，新一年要再上層樓，大學喺一月中就會公布未來五年嘅發展大綱，仲會羅列城大依家嘅缺點，要再對症下藥咁話。
郭校長仲漏口風，話城大密鑼緊鼓籌辦獸醫課程，有城中富豪已經拍心口寫支票支持，相信好快會成事。